الدرس رقم ٥ – عمق الميدان

 الدرس رقم ٥ – عمق الميدان

في المواضيع السابقة تعلمنا مثلث التعريض

وأن التمكن منه يخلينا نتحكم بكمية الضوء

وان العناصر المكونة له تأثر أيضاً على

- تجميد الحركة

- التحكم بعمق الميدان

- زيادة التحبب في الصور.

تجميد الحركة أو تثبيتها .. هو عكس اهتزاز الصور تقريباً وموضوعها بشكل عام بسيط وهو عمل يقوم به سرعة الغالق

بس في مصطلح جديد طلع لنا وهو (عمق الميدان) – اللي تتحكم فيه فتحة العدسة جزئياً.

وش يكون ؟

وش فايدته ؟

من يتحكم فيه ؟

نشوف مع بعض

وش هو عمق الميدان ؟

عمق الميدان أو Depth OF Field

DOF

يقصد به المسافة أو المنطقة اللي تركيزها واضح أو الفوكس حقها مضبوط

يمكن بالصورة يكون عمق الميدان أوضح

نشوف في الصورة الأولى .. الوردة رقم ٢ هي اللي داخه في نطاق الفوكس

والوردتين ١ و ٣ .. خارجين خارج نطاق الفوكس

لكن في الصورة اللي تحتها مباشرة كل الوردات الثلاث داخلين ضمن نطاق الفوكس

شفتوا المسافة هذي .. هي عمق الميدان

وش فائدة عمق الميدان ؟

من نفس المثال السابق يتضح لنا فائدة عمق الميدان هي

ادخال أو اخراج العناصر من الفوكس أو منطقة التركيز في الكاميرا

فيه ناس تسمي الشيء هذا “عزل” بس أتوقع كثير من المصورين يرفض هذا التعبير لأنه غير دقيق

وش اللي يأثر في عمق الميدان ؟

اللي يأثر في عمق الميدان ثلاث عناصر مهمة

- فتحة العدسة

- البعد البؤري .. واللي هو المسافة بين الحساس والعدسة الخارجية

- المسافة بين الكاميرا والعنصر المراد تصويره

وهذي صورة توضح هالكلام

 الدرس رقم ٤ – الآيزو ISO

مجرد تذكير سريع

قلنا ان مثلث التعريض يتكون من ثلاث عناصر رئيسية

١- سرعة الغالق

٢- فتحة العدسة

٣- الحساسية (وهي عنوان درسنا اليوم)

الحساسية – ISO

الحساسية هي الحساسية زي ما قلنا أمس بأن فتحة العدسة هي فتحة العدسة

لا من جد عاد .. بدون استهبال

الحساسية المقصود بها حساسية الحساس للضوء

يعني وش كثر الحساس يتأثر بالضوء.

أنا متأكد ان الكثيــــر قد صوروا صور وطلعت زي هذي

وكثيرين بعد ما يشوفون كاميراتهم تصور زي كذا يقولون كاميرتي بايخة ويرميها في الدولاب أو في الدرج أو نلقاه عارضها للبيع في أحد المنتديات

طيب انتظر شوي .. شوف وين المشكلة .. ليش مستعجل ؟

لا تتوقع انك أول واحد يستقعد له الآيزو تراهي معقده المصورين من زمــــان

قبل ما أجيب لك قصص الأولين مع الحساسية أو الآيزو. خلونا نشوف متى نحتاج نعدل في الآيزو

في مثلث التعريض نعرف ان لــ

سرعة الغالق تاثيرين : التحكم بالضوء و تجميد الحركة

 فتحة العدسة تأثيرين : التحكم بالضوء و عمق الميدان

إذا المصور يبي يصور صورة ويحتاج إعدادات معينة لسرعة الغالق (مثلاً ١/60٠٠)

ويبي أكبر فتحة عدسة ممكنة لعدسته مثلاً (٣.٥)

وصور صورة وطلعت مظلمة زي كذا

والمصور مرررة متورط ..

ما يقدر يغير سرعة الغالق ويخليها أبطأ لأنه خايف من الاهتزاز

وما يقدر يغير فتحة العدسة لأن العدسة هذي امكانياتها

وش يسوي ؟ يعتزل تصوير ؟

لا طبعاً

وقتها يبدأ يغير في الآيزو.. ويرفعه

الآيزو في الكاميرات يتدرج ما بين الـ ٥٠ إلى ٢٠٤٨٠٠ وأكثر ويكون على وقفات زي كذا

٥٠ – ١٠٠ – ٢٠٠ – ٤٠٠ – ٨٠٠ – ١٦٠٠ – ٣٢٠٠ – الخ

كل ما كان القيمة أقل كل ما كانت كمية الحساسية أقل وبالتالي ضوء أقل في الصورة.

بتقولون ارفع الآيزو على أعلى شيء !

المصور اللي قبل شوي كان مجبور رنه يرفع الآيزو عشان ما تكون صورته مظلمة

يوم رفع الآيزو شوفوا وش صار

طلعت لنا صورة بتعريض متناسب .. بس في المقابل واجهنا عيب التحبب في الصور أو النويز noise

التحبب في الصور هو أكبر عيوب رفع الآيزو

الحمدلله مع التطور في الكاميرات والحساسات صار بإمكان المصور انه يرفع الآيزو إلى ٦٤٠٠ ومايوضح شيء في الصورة (بعض الكاميرات مو كلها)

خلونا نشوف مقارنة بين الصورتين قبل مايرفع الآيزو وبعد

نشوف على اليسار صورة بدون نويز بس مظلمة

على اليمين صورة واضحة بس كلها نويز

تكلمنا قبل شوي وقلنا ان المصورين الأولين تعذبوا من الآيزو .. ليه ؟

الحين عندنا حساس والحساس هو اللي يتأثر بالحساسية

بس أول مافيه حساس .. كان فيه فلم

فكان المصور إذا يبي يغير الآيزو يروح يغير الفلم

والله مشوااااار

الحين بس تفر لك زر في الكاميرا وخلاص

كل موديل كاميرا يختلف عن الثانية في المدى حق الآيزو الخاص فيها

راجع مواصفات الكاميرا وشوف وش المدى الخاص بكاميرتك

كل ما قل الآيزو كل ما كانت الصورة أنقى وأكثر دقة .. بس في المقابل الضوء اللي يدخل أقل

دائما … خل الآيزو آخر الحلول لديك

جرب تغير  سرعة الغالق أو فتحة العدسة للوصول للتعريض المثالي

إذا ما قدرت وقتها جرب الآيزو

الدرس رقم ٣ – فتحة العدسة

وبعد كلامنا أمس عن سرعة الغالق اليوم بنتكلم عن العنصر الثاني فيمثلث التعريض وهو فتحة العدسة

نشوف دائما نشوف شعارها .. وهو يرمز دائماً لفتحة العدسة اللي تتكون من شرائح دائرية تتحكم في قطر الدائرة للعدسة

تقريباً بهالشكل

ولحد يجي يقول لي أنا شفته مع جيمس بوند ووش علاقته فيه..لأني بصراحة ما أدري.

فتحة العدسة يتبين لنا من اسمها انها شيء خاص بالعدسة وفي الغالب يعتبر ميزة كبيرة في العدسات وتساهم كثير في اختلاف النتائج واختلاف الأسعار بين العدسات

شركات تصنيع العدسات يهمهم كبر فتحة العدسة لأنه هو العامل الأصعب في الموضوع. صغر فتحة العدسة شيء بسيط والكل قادر عليه.

 

نشوف فوق السعر تدبل تقريباً ٣ مرات والسبب فتحة العدسة بالإضافة لجودة التصنيع (بودي) وبعض المواصفات الداخلية

بس العامل الأساسي فتحة العدسة

فتحة العسة يرمز لها في أغلب الكاميرات بالحرف A وهو اختصار لكلمةApreture

 وتعني فتحة العدسة وتقاس بالـ f/stop

كل ما صغر الرقم كل ما كبرت الفتحة

وكل ما كبر الرقم كل ما صغرت الفتحة

الخوف من مدرس رياضيات يجي يحوسنا على هالكلام

بس صدقوني كلامي صحيح .. وشوفوا الصورة عشان تصدقوني

الصورة اللي فوق تبين لنا ان ٢.٨ أكبر من ٤ وان ١٦ أكبر من ٢٢

ففي الدروس الجاية أو في تويتر أو سمعتوا أي مصور يقول فتحة عدسة أكبر فاعرفوا ان المقصود رقم أصغر

فتحة العدسة هي فتحة العدسة ..ما عرفت أبسطها أكثر

بس نقدر نقول ان فتحة العدسة ممكن تتصغر وممكن تتكبر عن طريق الكاميرا وفي بعض العدسات (خصوصاً القديم منها) ممكن التحكم بها عن طريق العدسة نفسها.

 

لقتحة العدسة تأثيرين مهمين

الأول خاص بكمية الضوء مثلها مثل كل عناصر مثلث التعريض

والثاني عمق الميدان

فتحة العدسة كل ما كبرت كل ما دخل ضوء أكثر

فتحة العدسة كل ما صغرت كل ما قل الضوء

 

فتحة العدسة كل ما كبرت كل ما صغر أو ضاق عندنا عمق الميدان

فتحة العدسة كل ما صغرت كل ما زاد أو اتسع عندنا عمق الميدان

عمق الميدان هو أحد العوامل المهمة والمؤثرة كثير في الصور وفي “العزل” وله درس خاص.

نشوف في الصورة فوق كيف لما كانت الفتحة كبيرة كان الجدار في الخلفية نوعاً ما “معزول”

ولما صغرنا فتحة العدسة بدأ يدخل من ضمن “عمق الميدان”

- للمهتمين بالـ “عزل” استخدم أكبر فتحة عدسة ممكنة

- فتحة العدسة تؤثر وبشكل كبير في حدة الصورة

- لا يعني تصغير الفتحة إلى أصغر شيء ممكن ينتج عنه أعلى حدة ممكنة. لكل عدسة مواصفات خاصة.

في درس سرعة الغالق فيه وضع خاص اسمه ( أولوية سرعة الغالق ) كان يمكننا من التحكم فقط بسرعة الغالق والباقي على الكاميرا.

نفس الشيء ممكن بالنسبة لفتحة العدسة لها وضع خاص اسمه ( أولوية فتحة العدسة )

الوضع أو الـ mode موجود في نيكون وكانون في الصورة التالية

إذا حطينا الكاميرا على وضع أولوية فتحة العدسة. الكاميرا بتعطيك الخيار انك تعدل الفتحة وبتتحكم الكاميرا بسرعة الغالق.